Ndërsa 18-vjeçarja Nazime Visha ndodhet në ambientet e paraburgimit 313 në pritje të përfundimit të hetimeve ndaj saj për vrasjen e Fiqiri Muçës, Prokuroria i ka konfirmuar paraprakisht të gjitha dyshimet e saj se autore e këtij krimi është adoleshentja dhe se ndaj viktimës nuk është qëlluar nga person tjetër.

Burime të sigurta të Top Channel deklarojnë se një grup hetimor me përfaqësues të prokurorisë dhe policisë kanë kryer një eksperiment hetimor për t’u bindur se vajza nga Malvilëza dinte më së miri të qëllonte me armë.

Burimet shtuan se Nazimeja është shoqëruar për në një poligon në Mullet ku i është dhënë një armë e ngjashme sikurse ajo e krimit. Vajzës i është kërkuar që ta mbushë vetë armën për të parë nëse ishte e aftë apo jo dhe me pas i është thënë të qëllonte drejt disa piketave.

“Gjithë ky eksperiment,- vijuan burimet,- rezultoi i tillë që i bindi hetuesit se adoleshentja jo vetëm kishte informacion për armët, zbërthimin dhe mbushjen e tyre, por edhe se ishte një qitëse shumë e mirë”.

Ndërkohë hetuesit po kompletojnë dosjen hetimore pasi kanë rimarrë në pyetje gjyshen dhe familjarë të adoleshentes për të saktësuar më qartë motivin e vrasjes së 45-vjeçarit Fiqiri Muça.

“Deri më tani,- pohoi një burim, - jemi të bindur se Nazime Visha ka mësuar fakte shumë tronditëse rreth veprimeve të viktimës, se ajo pak ditë para krimit ka kaluar një krizë të fortë emocionale, pasi ka mësuar këto detaje, çka e ka shtyrë atë të kryejë vrasjen me dashje të plotë”.

Ndërkaq prokuroria duket se do t’i qëndrojë të dhënave të mbledhura edhe nga rrëfimi i autores, por edhe ekspertiza mjeko-ligjore se ajo ka qenë fillimisht e abuzuar seksualisht në një moshe kur ajo ishte fëmijë./TCH