EULEX-i e ka shtuar praninë e tij në veri të Kosovës për shkak të rritjes së tensioneve gjatë javëve të fundit.

Policia e EULEX-it i ka shtuar patrullat lëvizëse në fshatrat përreth Mitrovicës si dhe në pjesën veriore të Mitrovicës, veçanërisht në zonën e “Tre rrokaqiejve”, bën të ditur sot EULEX përmes një komunikate për media.

EULEX-i vazhdon të bashkëpunojë ngushtë me kolegët e tij në KFOR dhe Policinë e Kosovës. Po ashtu, kohëve të fundit edhe KFOR-i i ka shtuar patrullat e tij dhe nëse rrethanat e kërkojnë një gjë të tillë, ato mund të thirren për t’i ndihmuar EULEX-it. Është me rëndësi që të gjitha komunitetet ta ruajnë qetësinë gjatë kësaj kohe dhe ta respektojnë rendin dhe ligjin, bën thirrje EULEX-i.

Qëllimi i kësaj pranie të shtuar është që komunitetit në përgjithësi t’u ofrohet ndjenja e sigurisë si dhe të shtohet siguria publike. / Kosova.com