Besimtarët ortodoksë në gjithë Shqipërinë kanë kremtuar mesnatën e kaluar ringjalljen e Krishtit. Në Tiranë, mesha e Pashkëve në mesnatë në Kishën Ortodokse , e drejtuar nga Kryepeshkopi i Tiranës, Durrësit dhe gjithë Shqipërisë, Anastas Janullatos ka mbledhur besimtarët ortodoksë në një lutje për paqe, harmoni e lumturi.

Krerët më të lartë të shtetit u kanë përcjellë urimet besimtarëve ortodoksë përmes mesazheve dhe vizitave në selinë e Kishës Ortodokse në Tiranë.



Topi: Pashkët, dita e ripërtëritjes së besimit të Zoti

Presidenti Topi i ka dërguar një mesazh urimi Kryepeshkopit të Tiranës, Durrësit dhe të gjithë Shqipërisë, Fortlumturisë së Tij, Anastas Janullatos, përmes të cilit uron të gjithë besimtarët ortodoksë për festën e Pashkëve.

“Fortlumturia juaj, Kryepeshkop Anastas Janullatos,
Të nderuar besimtarë ortodoksë shqiptarë, kudo ku ndodheni!

Më lejoni që me rastin e Festës së ndritshme të Pashkëve, t’ju uroj nga zemra ‘Gëzuar dhe për shumë vjet’!

Dita e Pashkëve është ditë e shenjtë e ringjalljes së Krishtit, ditë e ringjalljes së shpirtit njerëzor dhe e ripërtëritjes së besimit tek Zoti! Nëpërmjet kësaj simbolike të mrekullueshme fetare të ringjalljes së jetës, në këtë vit shumë të rëndësishëm për Shqipërinë e për gjithë shqiptarët të festimit të 100-vjetorit të Pavarësisë, përfitoj nga rasti të uroj më shumë fat dhe begati për popullin shqiptar!

Le të shërbejë kjo ditë për të reflektuar e përmirësuar vetveten, por dhe për të evidentuar më shumë vlerat e mëdha të bashkëjetesës fetare e shpirtërore të shqiptarëve!

Njëkohësisht me të gjithë besimtarët ortodoksë, ju urojmë dhe Juve, Fortlumturia Juaj, shëndet të mirë e jetë të gjatë në misionin Tuaj të shenjtë për të mirën e njerëzimit!” – thuhet në mesazhin e urimit të Presidentit Topi.



Berisha: Kemi motive për t’iu falur Zotit, rilindëm 20 vite më parë

Kryeministri ka vizituar sot selinë e Kishës Ortodokse, ndërsa në urimin e tij për gjithë besimtarët ortodoksë përmes mediave ka theksuar se shqiptarët kanë motive të festojnë e të falënderojnë Zotin për rilindjen e tyre, që nisi 20 vjet më parë.

“Uroj që Pashka tjetër të na gjejë edhe më mirë, së bashku me vëllezërit ortodoksë ta festojmë në Katedralen e re. Ne shqiptarët kemi motive më të mëdha se kushdo tjetër që t’i falemi Zotit sepse ne jemi një komb i rilindur, sepse besimet tona janë besime të rilindura, sepse asnjë komb tjetër nuk pati fatin tonë të izolohej në errësirat më të thella, të privohej nga besimet dhe shpresat. Pra këto 20 vite, janë vite të rilindjes së vërtetë të shqiptarëve, të besimeve të tyre të mëdha.”- u shpreh Berisha.

Berisha u ndal më tej në bashkëjetesën ndërfetare në Shqipëri, si një vlerë me të cilën shqiptarët duhet të krenohen. / G.N.