Shkencëtarët austriakë ishin të suksesshëm dhe thyen një rekord të ri botëror të shpejtësisë për printimet më të shpejta të objekteve nano tredimensionale.
Për t’u bërë më të qartë për këtë që po shkruajmë, ju bëjmë me dije se këta shkencëtarë krijuan dhe printuan “skulptura” kaq të vogla, sa një kokërr rëre, për një kohë shumë më të shkurtër sesa njihej deri më sot. Kjo metodë e re i hap portat printimeve 3D në fusha të ndryshme, si ajo e mjekësisë, etj.
Shkencëtarët e Universitetit Teknik të Vjenës, të udhëhequr nga profesori Jurgen Stabfl i Institutit Shkencor të Lëndës Materiale, sipas BBC, brenda 4 minutave krijuan modelin e një makine të Formula 1, me gjatësi vetëm 0.285 milimetra, pra, sa një e pesta e milimetrit. Për të printuar këtë model, u nevojitën 100 shtresa të materialit, çdo një prej tyre e përbërë nga 200 reshta të veçanta printimi.
Kjo teknologji e re, sipas shkencëtarëve, mund të përdorej në printimin e molekulave mikroskopike biomedikale. Deri më sot, printimi 3D ka bërë hapa të rëndësishme në mbarë botën, por procedura e printimit është e ngadaltë dhe si rezultat, për shumë objekte 3-dimensionale komplekse nevojiten orë apo ditë të tëra për t’u shtypur në materialin e posaçëm.
Ndaj, metoda e re austriake ka si qëllim që të zgjidhë këtë problem, duke e përshpejtuar kohën e procedurës 500 deri në 1000 herë më shumë. Brenda një sekonde mund të shtypen 5 metra material tredimensional.