Teuta-Vllaznia është supersfida e javës së 16 të Kategorisë Superiore. Kryesuesit e tabelës së klasifikimit, të cilët kanë shkruar emrin e tyre në listën e pretendentëve kryesorë në këtë sezon, vijnë pas një serie rezultatesh pa fitore.

Trajneri Lika do të ketë probleme mungesash. Kapiteni Arian Sheta, mbrojtësi Fernando da Silva dhe mesfushori Renato Hyshmeri nuk do të luajnë në ndeshjen me Vllazninë. Sheta dhe Hyshmeri janë të dëmtuar, ndërsa Da Silva është i penalizuar me tre kartonë të verdhë.

Ndërsa në kampin e shkodranëve, shihet një skuadër e kompletuar dhe e motivuar për ta fituar ndeshjen e sotme, edhe pse do të luajnë në shtëpinë e durrsakëve. Ecuria pozitive e javëve të fundit të ekipit kuqeblu, i ka mbushur të gjithë me optimizëm dhe kështu marrja e ndonjë rezultati pozitiv në Durrës, nuk mund të konsiderohet surprizë apo “tabu”, madje as fitorja.

Trajneri Rudi Vata beson se të tijtë i kanë mundësitë për të marrë rezultat pozitiv në “Niko Dovana” “Ndeshjet e fundit, ekipi ynë ka pasur rritje të dukshme në të gjitha aspektet e lojës së vet. Skuadra ka prodhuar gjithnjë lojë, por tani ka nisur edhe të shënojë, mangësi, që ishte evidente te ne. Tani jemi në rrugën e duhur dhe me gjithë respektin që kam për Teutën si ekip dhe si staf, Vllaznia shkon në Durrës me synimin për ta fituar ndeshjen”, ka pohuar në fillim numri një i pankinës shkodrane. Ai është ndalur pak edhe te vlerësimi, në mënyrë specifike tek ekipi kundërshtar. “Teuta, përveçse ka meritën, se që nga java e parë ka arritur të kryesojë kampionatin, pasi në krye të saj janë dy teknikë, të cilët janë ndër më të mirët në tregun futbollistik shqiptar (bëhet fjalë për trajnerin Hasan Lika dhe drejtorin teknik Sulejman Starova), ka një kontingjent lojtarësh për t’u admiruar dhe ka një president, më jetëgjati në futbollin shqiptar e mjaft kurajoz dhe ambicioz. Megjithatë këta faktorë, që duhen pasur mirë parasysh, nuk na trembin, por na japin më tepër forcë dhe kurajë për të marrë fitoren në Durrës. Objektivi ynë janë vetëm 3 pikët. Besoj se do të zhvillojmë një ndeshje të mirë dhe shpresoj të kemi edhe një gjykim korrekt”, ka thënë në fund trajneri i Vllaznisë, Rudi Vata, i cili në njëfarë mënyre ka anashkaluar kritikat për lojtarë të veçantë të tij, të lëshuara në mesjavë, pas takimit me Skënderbeun, duke u mjaftuar vetëm me shprehjen: “Ka episode, ku lojtarë të ndryshëm nuk shfaqen në formën sportive që duam dhe e kundërta, por e përgjithshmja është pozitive dhe s’duhet të ndalemi shumë në këto çështje, aq më tepër tani nuk është momenti i duhur”. Në skuadër janë rikthyer edhe Gocaj e Kraja. Ndërsa shkodranët kanë udhëtuar që dje për në Durrës, ku janë akomoduar në pritje të ndeshjes së sotme në orën 18:00.
TCH