Një sapun që reagon ndaj fushave magnetike do të mund të shfrytëzohet për të pastruar derdhjet e naftës duke mos lënë prapa detergjentet që mund të shkaktojnë dëmtime në ambientin jetësor përreth. Hulumtuesit e Universitetit të Bristolit në Britaninë e Madhe, kanë tretur copëzat e hekurit në ujin që përmbante klor dhe jone të bromit, materiale që zakonisht gjendet në produkte shtëpiake si pastrues goje dhe pastrues të rrobave. Kjo ka krijuar qendrën metalike brenda grimcave të sapunit e cila mund të ndikohet nga një fushë magnetike në afërsi. Ekipi hulumtues ka provuar sapunin e ri duke e vendosur për testim në një tub mbi shtresat me ujë dhe materie si nafta. Duke përdorur magnetin, ata kanë qenë në gjendje të kapërcenin gravitetin dhe tensionin sipërfaqësor për të nxjerrë jashtë sapunin nga shtresat e brendshme të tubit.

Ky testim ka treguar se është më lehtë të hiqet sapuni magnetik nga përzierja e lëngjeve të tjera, duke sugjeruar që mund të përdoret si kundërpërgjigje për katastrofat e mjedisit, siç janë derdhjet apo rrjedhjet e naftës, ku janë ngritur shqetësime lidhur me substancat e pastrimit që janë në përdorim. Një sapun magnetik mund të jetë i lehtë të mblidhet pas pastrimit.

Sapunët magnetikë po ashtu mund të kenë një varg aplikimesh industriale falë aftësisë së tyre për përçueshmëri elektrike dhe pikë shkrirjeje e cila mund të konfigurohet për kyçje/shkyçje përmes magnetit. Këto veti zakonisht realizohen duke shtuar ngarkesë elektrike ose duke ndryshuar pH-në ose presionin e substancës, që do të thotë se nuk mund të kthehet prapa.