“Janë të vdekur e nuk mund të varrosen, janë të gjallë e po vdesin” kështu u shpreh kryetari i komunës Shalë në Shkodër, Bal Vuksani në mbledhjen e shtabit të emergjencës të prefekturës së Shkodrës.

“Janë dy të vdekur që nuk varrosen dot atje dhe njerëzit i kanë në Shkodër e duhen sjellë kufomat këtej. Njëra ka katër ditë i vdekur. Dy të tjerë sipas komunikimit që kam me nënkryetarin e komunës dhe infermierët në tonë janë në prag të vdekjes me hemorragji nga goja. Kemi kërkuar ndihmë por deri tani nuk ka asgjë konkrete”, tha ai.

Deklarimet e tij kanë sjellë kundërshtimin e prefektes, e cila ka theksuar se nuk ka asnjë viktimë nga i ftohi në qarkun e Shkodrës. “Viktima është një 68 vjeçar nga Pulti, Lazër Nika nga fshati Kasnec i komunës Pult në Shkodër por kjo nuk mund të quhet vdekje nga i ftohti pasi vdekja e tij ka qenë natyrore nga infarkti. Është një vdekje normale, ka patur njerëzit e afërt pranë dhe ne me gjithë kushtet e vështira kemi bërë të mundur ndërhyrjen për transportin e kufomës dhe varrosjen në Shkodër”, ka thënë Ademi.

Por burime nga ky fshat shprehen se në vdekjen e 68 vjeçarit kanë ndikuar temperaturat e ulëta”. Ndërkohë mësohet se dhe në komunën e Fierzës në Pukë, janë dy familje me 13 persona për të cilat nuk ka asnjë informacion pasi janë të bllokuar. Sipas drejtores së shëndetit publik, Irena Shestani ka patur transportim në rrugë tokësore dhe nga ajri të një 17 vjeçareje nga Pulti me pneumoni, një fëmije 2 vjeç me bronkopneumoni po nga Pulti, një 35 vjeçareje me kriza epileptike nga Pulti, një djalë 14 vjeç me pneumoni nga Ndreaj i Shoshit dhe dy raste vdekjeje natyrore në Pult dhe një 52 vjeçare në Gimaj të Shalës e cila ishte e operuar dhe vuante nga probleme kardiake, ishte e sëmurë kronike.

Gjatë 24 orëve të fundit në të gjithë territorin e qarkut nuk ka patur reshje dëbore por kanë vazhduar erërat të forta dhe temperatura tepër të ulta, më të theksuara këto në rrethin Pukë. Në rrethin e Shkodrës, akset që lidhin Shkodrën me rrethet Pukë, Lezhë, Malësi e Madhe kanë qenë të hapura.

Prej orës 04.00 të ditës së sotme qyteti i Shkodrës nuk ka patur energji elektrike për shkak të një defekti në linjën e tensionit 110 kvolt, aktualisht është bërë zgjidhja emergjente e furnizmit me energji dhe po punohet për riparimin e defektit.