Dy fotografi zyrtare janë publikuar këtë të hënë për të shënuar 60 vitet e Mbretëreshës Elizabeth në fron, çka e shndërron atë në monarken e dytë të Britanisë së Madhe e cila e prek këtë periudhë të gjatë qëndrimi në fron.

Gjatë kohës që ajo ka qenë në krye të mbretërisë, familja ka kaluar në jo pak periudha të vështira…mbi gjithçka vdekjen aksidentale të Princeshës Diana.

Por duket se gjithçka mori tjetër drejtim me atë që u cilësua martesa e shekullit, djalit të Dianës dhe princit Charles, Prince William dhe Catherine Middleton.

Mbretëresha Elizabeth II, aktualisht 85-vjeçe u ngjit në fron kur ishte vetëm 25-vjeçe, më 6 shkurt të vitit 1952, fill pas shuarjes së të atit, George VI, gjatë kohës që ishte në një tur në Kenya me bashkëshortin e saj, Princ Philip.

Në një dokumentar që u shfaq në BBC për të shënuar 60-vjetorin e Mbretëreshës Elizabeth në fron, Princ Harry, djali i vogël i Princit Charles ka pohuar: “Nuk mendoj që Elizabeth do ja dilte nëse s’do të kishte pasur në krah një burrë si Princi Philip i cili ka qenë një mbështetës i jashtëzakonshëm për të”.

Mbretëresha Elizabeth nga ana tjetër ka falënderuar këdo për mbështetjen e këtyre dekadave duke premtuar që tërë jetën e saj do e kalonte në shërbim të njerëzve, sikurse kishte bërë deri më tani.

“Shpresoj që ky jubile do të jetë një rast i mirë për t’ju treguar të gjithëve progresin që kemi bërë prej vitit 1952, kur unë erdha në fron. Më shumë se kaq, shpresoj të mund të shohim drejt së ardhmes”, ka deklaruar Mbretëresha Elizabeth.

Elizabeth ka qendruar në fron më gjatë se çdo monark tjetër, përveç Mbretëreshës Victoria, e cila sundoi prej vitit 1837 deri në vitin 1901.
Gjatë regjimit të Mbretëreshës Elizabeth, Mbretëria e Bashkuar ka pasur 12 kryeministra, 12 presidentë dhe 6 Papa. Ajo ka vizituar 116 shtete të ndryshme. E për të shënuar këtë 60-vjetor të sajin në fron, Mbretëresha Elizabeth ka zgjedhur të bëjë punën e saj të përditshme.