Shpresa të reja për luftimin e virusit HIV/AIDS krijon zbulimi i antitrupave të efektshëm të HIV, të cilët pritet që të përdoren për përgatitjen e një vaksine të re. Sipas agjencisë gjermane të lajmeve, një ekip shkencëtarësh amerikanë të Insituteve Kombëtare të Shëndetit (NIH) gjetën dy proteinat të cilat mund të eleminojnë 90% të varianteve të njohura të HIV.

Bëhet fjalë për antitrupat VRCO1 dhe VRCO2, që mund të neutralizojnë fuqishëm virusin vdekjeprurës. Hapi i ardhshëm për shkencëtarët është sintetizimi i një vaksine të mundshme nëpërmjet këtyre dy antitrupave, vaksinë e cila mund të lehtësojë mijëra pacientë që janë bartës të AIDS.

Lajmi i zbulimit të dy antitrupave vjen dhjetë ditë para samitit ndërkombëtar për luftimin e AIDS, në Vjenë.