Instinkti mashkullor është fajtor për konfliktet më të mëdha në botë, që prej huliganizmit në futboll, pastaj konflikteve fetare, e deri tek luftërat botërore, pohojnë shkencëtarët kalifornianë.

Instinkti i “luftëtarit mashkullor” tregon që meshkujt janë të programuar që të jenë agresivë ndaj secilit që e shohin si kërcënim, thuhet në studim. Deri tek rezultatet kanë ardhur duke shqyrtuar një sasi të madhe të literaturës akademike për temat e konflikteve dhe natyrën njerëzore.

Në kuptim të evolucionit, instinkti i dhunës i ka ndihmuar njeriut që të vendosë statusin e vet dhe të ketë më shumë qasje tek femrat, por në kohërat moderne ky instinkt reflektohet në luftëra botërore. Hulumtuesit pohojnë që, në kundërshtim me këtë, femrat kanë prirje për zgjidhjen e konflikteve për të mbrojtur fëmijët e tyre.

Studimi i ri pohon që në secilën kulturë, përgjatë historisë, meshkujt ishin më të prirë për të bërë luftëra dhe për dhunë se femrat. Sipas pohimeve të reja, meshkujt kanë më shumë pritje nga identiteti kolektiv se femrat.

“Zgjidhja e konflikteve duket e paarritshme, që do të thotë që ekziston një prirje e caktuar nga sjellja konfliktuoze. Shqyrtimi që i kemi bërë ne literaturës akademike sugjeron që ekziston tendenca e mendjes njerëzore për të filluar konflikt”, tha shefi i grupit akademik, i cili është marrë me hulumtimin, profesori Mark van Vugt, përcjell Telegraphi.

Profesori Van Vugt ka shtuar që sjellje e ngjashme ekziston edhe tek shimpanzeja dhe që meshkujt në mënyrë të vazhdueshme i mbikëqyrin kufijtë e territorit të tyre.

Shkencëtarët pohojnë që ekzistojnë disa dëshmi historike të cilat ndërlidhin instinktin seksual me konfliktet, si p.sh. Xhingis-Kani, për të cilin pohohet që ka 16 milionë pasardhës direkt. Për Vikingët po ashtu besohet që kanë lënë një gjurmë tejet të madhe gjenetike për shkak të instinktit të tyre për pushtimin e grupeve të tjera fisnore.