Forcat Ajrore Britanike janë duke realizuar misione që simulojnë një sulm mbi disa baza kryesore argjentinase, zbuloi ditën e hënë një artikull i “Daily Mail”, i cili pritet të tensionojë edhe më shumë marrëdhëniet tashmë të irrituara midis Londrës dhe Buenos Airesit.

Në muajt e fundit, ndërsa po afron 30-vjetori i betejës së ishujve Falklands në vitin 1982, këto dy shtete janë përfshirë nga një konflikt gjithmonë e më i ashpër diplomatik e verbal, që ka dëmtuar marrëdhëniet ekonomike dhe ka çuar në shpalljen e një bllokade për të gjithë anijet britanike në portet argjentinase.

Një tentativë e Argjentinës për të sfiduar sovranitetin e ishujve në OKB u rrëzua më parë gjatë vitit nga vetoja e Londrës, por kjo nuk e ka penguar presidenten De Kirchner që të vazhdojë retorikën e saj nacionalistëve ndaj ishujve të quajtur në spanjisht Malvinas, pjesë e kurorës së Mbretërisë së Bashkuar, ndonëse ndodhen vetëm disa dhjetëra kilometra nga territori i shtetit amerikanojugor.

Në një mision që duhet të mbetej sekret, “Daily Mail” raportoi se disa skuadra të përbërë nga pilotë veteranë janë duke u stërvitur natën, në kushte që simulojnë fluturimin në thellësi të territorit argjentinas dhe bombardimin e disa bazave të fortifikuara.

Është e qartë se qëllimi i vetëm i misioneve të tilla është që ushtria të mos gjendet e papërgatitur, nëse kriza do të përshkallëzohet në veprime ushtarake.

Argjentina realizoi një pushtim afatshkurtër të ishujve gjatë regjimit të juntës ushtarake të Galtierit në vitin 1982, por reagimi energjik i ushtrisë britanike dhe kryeministres Thatcher solli tërheqjen e trupave brenda disa muajve, në një konflikt që i mori jetën më shumë se një mijë ushtarëve nga të dyja palët.

Argjentina fitoi pavarësinë nga Spanja në vitin 1810, së bashku me territorin e Falklands. Megjithatë, Britania pushtoi ishujt në vitin 1831 dhe që prej atëherë, Falklands dhe disa arkipelage të tjerë pranë Argjentinës i përkasin Britanisë.
TCH