Pentagoni, ka investuar 11 milionë dollarë në zhvillimin e pilulës, e cila do të eliminonte ndjenjën e frikës të ndërlidhur me kujtimet traumatike nga fushëbetejat.

Hulumtimi është pjesë e përpjekjeve të Pentagonit që ta shërojë ushtrinë nga çrregullimi posttraumatik i stresit. Të hollat për hulumtim do t’u jepen qendrave të cilat qysh përpara kanë punuar për ushtrinë amerikane, Universitetit “Emory”, Universitetit në Kaliforninë Jugore dhe qendrës medicinave presbiteriane të New Yorkut. Shkencëtarët e tyre po ashtu do të hulumtojnë edhe prirjen gjenetike për t’u sëmurë nga çrregullimi posttraumatik i stresit.

Testet do të përfshijnë testimin e efektit që ka antibiotiku D-cikloserin në largimin e frikës dhe kujtimeve stresuese.

Përveç kësaj, zbutja e efekteve të sindromës posttraumatike do të bëhet edhe përmes ekspozimit të ushtarëve në realitetin virtual, gjegjësisht në 3D ambiente të simuluara kompjuterikisht, ku ata do të kalonin nëpër situata dhe skena të ngjashme traumatizuese nëpër të cilat janë gjendur më herët në jetën e tyre. Kjo do të duhej të zvogëlojë ndjeshmërinë e tyre ndaj situatave të tilla në të ardhmen, sikurse edhe frikën nga to.

Gjysma e të testuarve para trajtimit me realitetin virtual do të marrin antibiotikun e sipërpërmendur, ndërsa pjesa tjetër testimin do ta fillojë pa të. Rezultati i pritur nënkupton proces të përshpejtuar të largimit apo eliminimit të frikës tek ata që para situatës traumatizuese kanë konsumuar D-cikloserin.

Nëse testet tregohen të suksesshme, ushtria amerikane do të ketë pilulën e cila ushtarëve të traumatizuar do t’u mundësojë që pa hezitimi të futen në situata nga të cilat përndryshe kanë ikur pa kontroll për shkak të stresit të mëhershëm që është ndërlidhur me to.