Një mikro-robot, i ndërtuar posacërisht për të ndihmuar arkeologët në kërkimet e tyre në Piramidën e Diellit në Meksikë, zbuloi disa rrugë të reja nën Tempullin e Quetzalcouatl-it.

Arkeologët shpresojnë që në fund të këtyre rrugëve të pashkelura prej 2 mijë vitesh të mbërrijnë të paktën në një dhomë antike. Roboti, i pagëzuar me emrin Tlaloc II-TC, sipas emrit të perëndisë azteke të shiut, është i pajisur me një krah të automatizuar që e ndihmon atë të pastrojë pengesat që mund të hasë gjatë kërkimit.

Ai është i pajisur gjithashtu edhe me një aparat fotografik që regjistron me intervale kohore të barabarta duke ndihmuar shkencëtarët dhe arkeologët në sipërfaqe që të orientohen më mirë në përcaktimin e lëvizjes së tij.

Arkeologët shpresojnë të sigurojnë të dhëna të mjaftueshme për të kuptuar strukturën e Piramidës së Diellit, e shndërruar në zonë arkeologjike prej një shekulli, por që pak dihet për të.
Historianët meksikanë besojnë se bëhet fjalë për një ndërtesë të ngritur në nder të një udhëheqësi indigjen, rreth 2500 vite më parë.

Zona antike përfshin Piramidën e Diellit, atë të Hënës, disa tempuj e sheshe të shoqërisë prehispanike. I gjithë ky kompleks mendohet të ketë qenë qendra e një qyteti prej më shumë se 100 mijë banorësh, që e bëjnë atë kryeqendrën e Amerikës Veriore dhe asaj Qendrore para rënies fillimisht në dorë të aztekëve e më pas të kolonizuesve spanjollë.

Qyteti mendohet se është ngritur nga fiset indigjene rreth 2500 vite më parë dhe ka ruajtur fuqinë e tij deri në shekullin e parë para lindjes së Krishtit. Në vitin 1300, qyteti ra në duart e aztekëve të cilët e quajtën “qyteti ku njeriu bëhet Zot”.

Datimi me karbon, piramida e Diellit në Bosnje, 25 mijë vjeçare

Më në fund, arkeologët mundën të përcaktojnë moshën e piramidës së Diellit në Bosnje!
Arkeologët italianë, Prof. Dr. Ricarrdo Brett dhe Niccolo Biskonti, zbuluan në material organik (një gjethe) në kulmin e piramidës, në majën e pllakave të gurta që mbulojnë piramidën boshnjake të Diellit, në muajin qershor të këtij viti.

Pas një analizimi në laboratorët bashkëkohorë, në Kiev të Ukrainës (specialist në këtë fushë), rezultati ishte mbresëlënës, pasi piramida rezultoi të ketë moshën 25.000 vjeçare, me një shkallë gabimi +/- 200 vjet.

Ky rezultat erdhi pas analizave me karbon, e cila e vendos piramidën 20 mijë vjet më herët se qytetërimet e Sumerëve dhe Babiloniasve, dhe na qas në një epokë ku civilizimi nuk ishte i organizuar, ose nuk ekzistonte, pasi nuk mund të ekzistonin parametrat dhe strukturat për një ndërtim të tillë, sipas historigrafisë dhe shkencës së sotme.
Atëherë lind pyetje: Kush e ndërtoi piramidën e Diellit në Bosnje?
Duhet theksuar se ende dhe sot, ekzistojnë shumë arkeologë, të cilët përmendin idenë e civilizimeve para 5 mijë vjetëve. Megjithatë, ky faktim i fundit i rezultuar nga laboratorët bashkëkohor për piramidën e Bosnjës, mbështet teorinë se kanë ekzistuar shumë civilizime të zhvilluara, para civilizimit tonë.
Por, duhet theksuar se ka gjithnjë e më shumë zëra që edhe fillimin e ndërtimit të piramidave në Egjipt, po e shtyjnë jo më në rreth 5 mijë vjet nga sot, por në rreth 10 mijë vjet.
Si duket të dhënat për ekzistencën e një qytetërimi sikur Atlantida, apo para saj, vetëm sa po plotësohen.