HKUP - Manifestimi qendror i shqiptarëve të Maqedonisë për festimin e 100-vjetorit të Pavarësisë së Shqipërisë do të zhvillohet sot në mbrëmje në ora 18:00 me një koncert në sallën sportive “Boris Trajkovski” në Shkup. Në këtë aktivitetit pritet të marrin pjesë edhe dy kryeministrat, ai i Shqipërisë, Sali Berisha dhe i Kosovës Hashim Thaçi. Për nder të tyre rrugët dhe bulevardet e Shkupit janë stolisur kuq e zi. Për t’i uruar mirëseardhjen dy kryeministrave Berisha e Thaçi, është vendosur një billbord i madh ndërsa dy flamuj të përmasave të mëdha, atij kombëtar dhe flamuri me logon e 100-Vjetorit të Pavarësisë janë vendosur edhe në qendrën tregtare “Mavrovasja”.

Ndërkohë situata në rajonin e Tetovës është tensionuar ndjeshëm një ditë pasi kryeministri i Maqedonisë, Nikola Gruevski zhvilloi një vizitë zyrtare në Tiranë. Sipas policisë lokale në orën 01:20 të mëngjesit të djeshëm, persona ende të paidentifikuar kanë djegur flamuj shqiptarë në afër të fshatit Sedllarcë e Epërme. Ndërsa, në orën 05:00 të mëngjesit një person i panjohur ka tentuar të grisë dhe të heq flamurin tonë kombëtar të shpalosur tek Shtëpia e Kulturës në Tetovë.

Policët, të cilët për herë të parë janë angazhuar të ruajnë flamurin shqiptar, sipas agjencive lokale të lajmeve e kanë pikasur autorin që i ishte afruar flamurit, dhe e kishin ndalur atë për t’i kërkuar dokument identifikimi. Por personi ka nxjerrë thikën duke goditur njërin prej policëve. Po ashtu, vetëm disa orë më vonë, persona të tjerë të panjohur kanë djegur flamurin kombëtar të shpalosur në njërën nga urat e autostradës Tetovë-Gostivar.

Aktet vandale në Tetovë pasojnë ato të regjistruara në Tiranë, ku gjithashtu persona të paidentifikuar, që mbanin kapuç të zinj e të maskuar në fytyrë, zhvatën e mandej dogjën flamujt e Maqedonisë të vendosur në sheshin “Nënë Tereza” me rastin e vizitës së kryeministrit, Nikolla Gruevski./BalkanWeb