SARANDE - Një çift grek po mbahet prej disa orësh peng në fshatin Janjar të rrethit Sarandë. Grekët kishin kaluar kufirin në orët e drekës së sotme, me qëllim për të shkuar në fshatin Janjar, pjesë e Komunës Markat, për të tërhequr lopët e grabitura nga një grup personash nga ky fshat përgjatë dy ditëve të fundit.

Mbërritja e tyre në fshatin Janjar erdhi fill pas arrestimit të Rushit Ismailit dhe shpalljes në kërkim të Astrit Ismailit nga ana e Policisë së Sarandës të cilët mendohet se janë autorë të grabitjes së lopëve dhe bagëtive të shtetasit grek I.V. nga fshati Palamba në afërsi të qytetit Igumenica në Greqi.

Çifti grek sapo mbërriti në fshatin shqiptar Janjar, kërkoi tërheqjen e lopëve dhe bagëtive të grabitura, por aty u ndesh në rezistencën e familjarëve të të arrestuarit Rushit Ismaili, të cilët jo vetëm që nuk lëshuan asnjë kokë bagëti apo lopë por kundërshtuan në mënyrë të hapur që gjëja e gjallë pronë e grekëve t’u rikthehej atyre.

Situata u përkeqësua mjaft aq sa pjesëtarë të familjes së të arrestuarit të sotëm, rrahën dhe po mbajnë ende peng mbrëmjen e sotme çiftin grek, duke mos lejuar kthimin e tyre drejt territorit të vendit fqinj dhe kësisoj duke krijuar një ngjarje të paprecedentë qysh prej vitit të largët ’97.

I gjithë episodi, është zhvilluar në afërsi të piramidës 52 në kufirin shqiptaro-grek, ndërkohë që Policia e Sarandës, deri rreth orë 21:00 ende nuk kishte shkuar në vendngjarje, për të liruar nga pengmarrja çiftin grek të cilët muajt e fundit, kanë rënë pre e grabitjes së 87 kokë bagëtive dhe 32 lopëve.

Gjatë javëve të fundit, banorët e fshatrave grekë Ahur, Koskë dhe Palamba të Igumenicës, janë ankuar për një valë grabitjesh të gjësë së gjallë që në të shumtën e rasteve kanë për autorë banorë të fshatit Janjar në territorin shqiptar.