TIRANE- Studioja ligjore që ka marrë tenderin pa garë të kompanisë shtetërore “Albpetrol” kundër kompanisë “ARMO sha” dhe që përton nga buxheti shtetit 80 milionë lekë është “Optima Legal& Finances” dhe ka pjesë të stat të saj vëllain e kryebashkiakut Lulzim Basha. Fitimi i 80 milionë lekëve(të vjetra) nga kjo kompani është bërë pa garë dhe ky fakt është bërë i ditur nga vetë “Albpetrol”.

Kjo kompani është themeluar në vitin 2008, sot ajo zotërohet nga dy aksionarë që kanë përkatësisht nga 50 përqind aksione. Ata janë Ilir Daci dhe Glon Bakalli. Daci është një jurist që më herët ka punuar në disa studio të njohura avokatie në Tiranë. Ndërsa Bakalli është një sipërrmarës, ai është shqiptar por me shtetësi italiane dhe është pronar dhe bashkëaksionar në të paktën tetë kompani të regjistruara në Tiranë. Përsa i përket studios ligjore "Optima Legal& Finances", në faqen elektronike të kësaj kompanie spikat prezenca e Erlindi Bashës. Ai është vëllai i kryebashkiakut Lulzim Basha. Në faqen elektronike të stafit të kompanisë Erlindi Basha renditet si pjesë e stafit të juristëve të kësaj kompanie. Por duket se Erlindi Basha ka një lidhje edhe më të fortë me këtë kompani sesa thjesht jurist. Erlindi Basha, përveçse një jurist i thjeshtë te "Optima" zotëron edhe një kompani të vetën për "konsulencë ligjore". Duket se dypunësimi i vëllait të kryebashkiakut nuk është një problem, pasi edhe kompania "Optima Legal& Finances" ku ai figuron thjesht jurist, por edhe studioja e tij private ligjore ndodhen ekzaktësisht në të njëjtin vend, ekzaktësisht të regjistruara me të njëjtën adresë: "Rruga Dëshmorët e 4 Shkurtit, Sky Tower, Kati 8/3"

PËRFAQËSIMI
Studioja ligjore e pajtuar pa garë nga "Albpetrol" duket se për shumë kohë ka qenë studioja e preferuar e Ministrisë së Ekonomisë dhe drejtorive të saj. Me një kërkim të thjeshtë në internet me emrat e juristëve të kësaj studioje, zbulon se ata kanë qenë shpesh herë përfaqësues të AKBN-së (Agjencisë së Burimeve Natyrore) si dhe enteve të tjera të ministrisë së Ekonomisë në gjyqet që ky institucion ka patur me palë të ndryshme. Kjo studio ligjore shfaqet aktive në përfaqësimin e Ministrisë së Ekonomisë në të gjitha shkallët e gjyqësorit ku janë gjykuar mosmarrëveshjet e kësaj ministrie me biznese të ndryshme të cilat kanë hedhur në gjyq ministrinë ose anasjelltas.

KOMPANIA
Studioja ligjore "Optima Legal& Finances" është një kompani e themeluar në korrik të vitit 2008. Fillimisht në këtë kompani përveç dy aksionarëve Daci dhe Bakalli ka qenë prezent në paketën e aksioneve dhe shtetasi Dael Dervishi. Ai është djali i ambasadorit shqiptar në Greqi, Dashnor Dervishi, i cili është diplomat karriere i mbështetur nga Lëvizja Socialiste për Integrim. Nga ekstrakti në Qendrën Kombëtare të Biznesit rezulton se Dael Dervishi i ka shitur të gjitha aksionet e tij në vitin 2009 dhe paketën e aksioneve që prej asaj kohe e kanë kontrolluar shtetasit Ilir Daci dhe Glon Bakalli. Zyrtarisht kompania ka si objekt të aktivitetit të saj kryerjen e shërbimeve dhe asistencës ligjore ne fusha të ndryshme të së drejtës. "Ky aktivitet kryhet duke përfituar të ardhurat nga ushtrimi i këtij aktiviteti si dhe çdo veprimtari tjetër te natyres financiare e tregtare për permbushjen e aktivitetit të shoqerisë, në përputhje me Ligjin Shqiptar", - shkruhet në ekstraktin e kompanisë.