Kishin fituar llotarinë, por… nuk e dinin!

Një çift nga Britania e Madhe, zbuloi se kishte fituar një loto me vlerë 1 milion paund, kuponin e të cilës e mbante për më shumë se dy muaj të ngjitur me magnete në sipërfaqen e frigoriferit, pa e ditur vlerën e tij.

Alan dhe Kim Eliot e hapnin frigoriferin çdo ditë, por pa e ditur se kuponi që kishin ngjitur aty, ishte ai me fat, që do t’i bënte super të pasur. Ata e kishin blerë atë në muajin mars, kur edhe ishte hedhur shorti i llotos “EuroMillions”.

Para pak ditësh Alan vendosi të shikonte në gazetë se cili ishte fituesi i 1 milion paundeve dhe i çuditur, mësoi se ishte vetë ai. Vërtet çifti humbi 7.500 paunde, pasi nuk e dorëzoi kuponin fitues brenda afateve kohore të përcaktuara nga rregullatorja e llotos, por në 1 milion paunde, çfarë janë 7.500!

Tashmë dy fatlumët po përgatiten të bëjnë pushime në hotele luksoze, si dhe të blejnë një makinë të re.

“Kur shkova në agjenci, mësova se kisha fituar 1 milion paunde. Nuk e besoja në fillim, kujtoja mos më bënin shaka. Kur u binda për shumën që kisha fituar, shkova menjëherë në shtëpi, që të lumturoja edhe bashkëshorten time”, tha Alan.

Ndërkohë, Kim shton: “Alan më mori në telefon dhe më tha se kishte diçka serioze për të më thënë. Unë u tremba se mos kishte ndodhur diçka e keqe dhe fillova të qaja. Kur ai hyri në shtëpi, më tha: “U bëmë milionerë”. E humba krejt dhe m’u desh pak kohë për të kuptuar se çfarë kishte ndodhur”, tha gruaja 45-vjeçare.

Pra, ndodh edhe kështu. Ndaj fatit asnjëherë nuk i dihet.