Vdekje misterioze e shpendëve në Angli

Ekspertët për mbrojtjen e kafshëve në Angli janë intriguar nga vdekja e 75 shpendëve që me sa duket ranë nga qielli dhe u përplasën për tokë.

Zogjët u gjetën në një rrugë të një shtëpie në Coxley, Somerset, me sqepë, këmbë dhe krahë të thyer dhe me lëndime në bark.

RSPCA (Shoqata Mbretërore për mbrojtjen e kafshëve) filloi të hetojë se si shpendët kanë mbetur të vdekur, por ata nuk besojnë se ata ishin të sëmurë ose të helmuar para se të bien nga qielli në grup.

Sipas deklaratës së Alison Sparkes dhënë BBC, kalimtarët kanë dëgjuar një shushurimë dhe pastaj zogjtë kanë goditur papritmas tokën. Ata ranë në tokë në një zonë mjaft të ngushtë, rreth 3,6 m diametër.

Shkencëtarët amerikanë dyshojnë se fishekzjarrët mund të kenë qenë shkaku përse mijëra zogj ranë nga qielli mbi qytetin e Arkansasit në prag të Vitit të Ri.
Sipas shkencëtarëve, zogjtë e zinj me krahë të kuq kanë fluturuar ulët për të shmangur shpërthimet e fishekzjarrëve dhe për pasojë janë përplasur me objekte të ndryshme.

Gjithsesi, siç njofton TCH, është herët të thuhet se misteri është zgjidhur, pasi teste të tjera mbi zogjtë e ngordhur do të kryhen.

Autoritetet deklarojnë se mbi 3 mijë zogj ranë në rrugët e qytetit të Bibit dhe se ata pak që mbijetuan vinin vërdallë sikur ishin të dehur.

Qytetarët kanë pasur vështirësi në qarkullim dhe u është dashur që me veturat e tyre të kalonin mbi trupat e zogjve të ngordhur.

Ndërkohë, rreth 200 kilometra larg këtij vendi, në lumin e Arkansasit u gjendën 100 mijë peshq të ngordhur. Ekspertët përjashtojnë helmimin, por ende nuk dinë për shkaqet.


“Shi” i zogjve të ngordhur edhe në Suedi

Vetëm disa ditë pasi mbi 3 000 zogj të ngordhur kanë rënë në territorin e Arkansasit dhe Louisianës në SHBA, ngjarje e njëjtë ndodhi edhe në Suedi, më saktësisht në qytetin Falkoeping, ku kanë rënë dhjetëra shpendë të ngordhur.

Disa syresh pas rënies janë shkelur nga automjetet, derisa të tjerët nuk kanë kurrfarë shenjash të dukshme plagësh. Shkaqet e ngordhjes së zogjve në dy skaje të botës ende po hulumtohen, edhe pese ekspertët amerikanë supozojnë se zogjtë kanë mundur ta pësojnë nga stresi pas fishekzjarrëve.

Mirëpo, pasi në qytetin suedez Falkoeping në disa ditë të fundit nuk ka pasur fishekzjarrë, aty nuk hidhet poshtë supozimi për ndonjë sëmundje apo helmim masiv të shpendëve. Për këtë arsye pesë zogj të ngordhur janë dërguar për analizë.

Bllogerët kanë shkuar një hap më tutje, duke e lidhur ngordhjen e shpendëve me “kiametin” e paralajmëruar për vitin 2012, ca të tjerë me eksperimente të fshehta të qeverisë amerikane, kurse disa edhe me teori se kjo është vepër e alienëve (jashtëtokësorëve).