Në botë përdoren rreth 4 miliardë telefona celularë dhe cilësohen si një nga zhvillimet me të rëndësishme të 20 viteve të fundit në fushën e teknologjisë. Por shërbimi më i domosdoshëm për njerëzit duket se ka një risk.

Sipas një studiuesi gjerman të Kompanisë së Kërkimeve për Sigurinë, Karsten Nohl, kohët e fundit është zbuluar se çdo telefon i rrjetit GSM (Global System for Mobile Communications) mund të hapet nga një përdorues tjetër dhe mund të dërgohen mesazhe dhe bëhen telefonata.

Në prezantimin e studimit në Berlin, Nohl tha se sistemi GSM do të jetë seriozisht i rrezikuar nëse hakerat vendosin ta sulmojnë raporton agjencia e lajmeve NOA.

Ai shton se problemi me sistemin e telefonisë mobile dhe fikse, është se qytetarët nuk kuptojnë asgjë çfarë ndodh me telefonin e tyre derisa sa arrin fatura me shifra marramendëse.

Nohl nuk ka dhënë detaje sesi dikush tjetër mund të sulmojë sistemin dhe të dërgojë mesazhe apo të bëjë telefonata nga numri i përdoruesit real, por ai thekson se rreziku është i mundshëm për çdo telefon.

Ai thotë se hakerat janë në gjendje të marrin në “kontroll të plotë” të numrit, pasi që nga viti 1990 format e komunikimit me zë dhe me mesazhe në telefona nuk kanë pasur siguri shtesë.

Nohl ka theksuar se sulme të ngjashme janë regjistruar më parë në smartphone dhe është mundësua identifikimi i sistemit që përdorin. Por sipas tij, hakerat ecin hap pas hapi me teknologjinë.

Më të rrezikuara në vitet e mëparshme kanë qenë linjat fikse, ku hakerat zgjidhnin kompani të mëdha për të vjedhur sinjalet dhe të folur në emër të kompanisë./NOA/