Dashamir Biçaku



TIRANE- Bankat e nivelit të dytë, në vend nuk ofrojnë sigurinë dhe nuk respektojnë ligjin përkatës për sigurinë e bankave. Ky pritet të jetë në thelb, një relacion i plotë dhe i detajuar që Drejtoria e Policisë së Tiranës t’i dërgojë Drejtorisë së Përgjithshme të Policisë. Rasti i fundit i Viktor Gushit, si dhe precedentët e shumtë të tij në bastisjen dhe sulmin me armë të bankave, si dhe lehtësia e me të cilën ai hynte në to që më pas t’i grabiste ai këto të fundit, pritet të jenë çështjet kryesore dhe shqetësim i rëndësishëm i relacionit të Drejtorisë së Policisë së Qarkut të Tiranës që do t’i dërgohet Drejtorisë së Përgjithshme të Policisë. Burime të policisë së Tiranës, thanë se një nga problemet të kryesore vërejtura nga blutë, gjatë hetimit të krimeve të grabitjes së bankave, por edhe nga specialistët e sektorit të Shoqërive private të Ruajtjes dhe Sigurisë Fizike (SHRSF), ka qenë mos zbatimi i ligjit për sigurinë e bankave, nga shumica e atyre që operojnë në kryeqytet. Ndërkaq shqetësime të tilla, mësohet se i janë referuar në mënyrë të herëpashershme Drejtorisë së Policisë së Shtetit nga blutë e Tiranës edhe në raste të tjera.

Kryepolici i Tiranës

Një shqetësim të tillë për një nivel të ulët të sigurisë së bankave e pohoi për “Shekullin” edhe Drejtori i Policisë së Qarkut të Tiranës, Bernard Çaushaj. Kryepolici i Tiranës tha për “Shekullin” se Bankës së Shqipërisë, pritet t’i dërgohet një memo për çështjet e sigurisë në banka. “Nëpërmjet kësaj memoje, do t’i kujtohen Bankës së Shqipërisë detyrimet e bankave të nivelit të dytë, si dhe subjekteve të tjera me objekt biznesin bankar të transfertave dhe të këmbimeve valutore se duhet të rritet niveli i sigurisë në to”. Drejtori i Policisë së Tiranës tha se një shqetësim i tillë ka ardhur nisur nga rastet e përsëritura të sulmit të bankave me armë. Çaushaj sqaroi se ndër elementët e sigurisë që kanë qenë problematike gjatë incidenteve dhe sulmeve të ndodhura kanë qenë, mungesa e numrit të kërkuar të rojeve të sigurisë, që në rastin më të ulët nuk duhet të jenë më pak se dy. Po kështu në shumë raste, janë vërejtur edhe mungesa të detektorëve metalikë në hyrje të bankave të cilët duhet të jenë të instaluar, ose të lëvizshëm.

Po kështu sipas tij, sistemi i dyerve të bankave në të cilat mungon thuajse në të gjitha rastet dera rrotulluese, apo dera e dytë, pas derës kryesore hyrëse. Xhami i blinduar përpara arkëtares si dhe elementë të tjerë sipas tij, nuk ekziston thuajse në asnjë bankë. Këto të fundit në shumë raste pretendojnë se vendosja e xhamit të blinduar në arkë, krijon barrierë mes klientit dhe punonjësve të kësaj të fundit. Ndërkaq Çaushaj, tha se do t’u kërkohet edhe shoqërive private të ruajtjes dhe sigurisë fizike që të përgatisnin një kategorizim të punonjësve të sigurisë të cilët do të lihen të ruajnë objekte me aktivitet financiar, që nga bankat e deri tek pikat e këmbimit valutor. Kjo për shkak se një pjesë e mirë e punonjësve të sigurisë që punësohen për këtë qëllim, janë në moshë të thyer dhe nuk kanë parametra të mjaftueshëm trupor për të përballuar një sulm fizik, apo me armë ndaj objekteve që ata ruajnë.