Në Parlamentin Evropian në Bruksel është diskutuar për Kosovën, ku është paraqitur edhe raporti i raportueses për Kosovën, Ulrike Lunaçek, e cila tha se raporti i saj “ka për qëllim të dërgojë mesazh të fuqishëm te shtetasit e Kosovës, se e ardhmja e Kosovës së pavarur është në Bashkimin Evropian”.

Ajo u ka bërë thirrje pesë vendeve të Bshkimit Evropian, që nuk e kanë njohur Republikën e Kosovës, që ta bëjnë këtë, pasi “kjo do t’i bënte më efektive përpjekjet e BE-së”.

Lunaçek ka kërkuar që qeveria e Kosovës t’u afrohet qytetarëve në pjesën veriore të Kosovës, ndërsa nga serbët e veriut kërkoi ta pranojnë planin Ahtisari.

Në lidhje me zgjedhjet serbe në Kosovë, ajo tha se “Serbia duhet të përmbahet nga mbajtja e tyre në pjesën veriore të Kosovës, pasi ato janë në kundërshtim me të drejtën ndërkombëtare” dhe madje nuk janë në linjë as me Rezolutën 1244 të Këshillit të Sigurimit të OKB-së.
Lunaçek, po ashtu i ka bërë thirrje Serbisë që “ta ndalë mbështetjen për strukturat paralele” në Kosovë.

Raportuesja Lunaçek tha se në Kosovë duhet të luftohet korrupsioni dhe krimi i organizuar, të punohet në reforma ekonomike, reforma zgjedhore, sundim të ligjit, liri të mediave, e të tjera. Ajo ka shfaqur shpresën se raporti i saj do të miratohet sot. / Kosova.com