Gjirokastër – Kryetari i Partisë së Bashkimit të të Drejtave të Njeriut, Vangjel Dule deklaron se është përgjegjësia e opozitës së vakët shqiptare që qeveria Berisha, megjithëse e papërshtatshme vazhdon të drejtojë vendin.

“Nëse kemi një qeverisje kryekëput të papërshtatshme për t’ju përgjigjur sfidave të shoqërisë e të vendit në një shkallë të konsiderueshme kjo i dedikohet edhe opozitës së vakët me një strategji evazive dhe me taktika inedikuate. Dhe nuk hezitojmë të marrim edhe ne përgjegjësinë që na takon për këtë opozitarizëm inefiçent”, është shprehur Dule.

Deklaratat e kreut të PBDNJ-së janë bërë gjatë një darke të organizuar në qytetin e Gjirokastrës me anëtarë të kësaj force politike. Po kështu, ndryshe nga drejtues dhe deputetë të Partisë Socialiste, Dule ka theksuar se për emergjencën e krijuar në veri dhe verlindje të vendit nuk është momenti për të bërë balance, por për të treguar solidaritet njerëzor.

“Me tejkalimin e gjendjes së vështirë, duhet menduar që edhe në vendin tonë të ngremë ato struktura që duhen, për t’ju përgjigjur situatave të tilla. Gjithsesi është edhe një moment që duke u nisur nga solidariteti njerëzor, të motivohet edhe bashkëpunimi politik.”

Gjatë darkës së organizuar nuk ka munguar as kryetari i organizatës OMONIA, Vasil Bollano dhe konsulli i përgjithshëm grek në Gjirokastër.