19- vjeçari i dyshuar për bombat në Boston është arrestuar, por gjendja e tij fizike është shumë e dobët dhe ai nuk flet dot me policinë. Në këto kushte mediat janë mbushur me spekulime se përse këta dy të rinj ndërmorën një hap të tillë.
Fotot e marra pak pas shpërthimit, që la tre të vdekur dhe rreth 180 të plagosur, kanë shtuar spekulimet se vëllezërit çeçenë mund të kenë lidhje me kauzën çeçene.
Bombat ishin vendosur poshtë flamurit rus, që rreshtohej mes flamujve të tjerë në rrugë.
Nëse ata janë rreshtuar përkrah betejës së gjatë të çeçenëve për pavarësi, ky do ishte sulmi i parë terrorist i separatistëve çeçenë në tokë të huaj.
Tamarlan Tsarnaev, që është i dyshuari kryesor, mendohet se ka marrë eksperiencë ushtarake në Rusi, ku ka qëndruar për gjashtë muaj vitin e shkuar.
Një ekspert i CNN thotë se mund të mësosh të bësh bomba dhe nga interneti, por të duhet praktikë për të realizuar një akt të tillë terrorist.
A e ka marrë këtë praktikë Tamerlan në Rusi?
Familja Tsarnaev, me origjinë çeçene, ka jetuar në Kirgistan, ku janë të vendosur shumë çeçenë. Më pas janë zhvendosur në Dagestan dhe më pas kanë kërkuar azil në SHBA.
Mediat amerikane thonë se janë shumë të rralla rastet kur çeçenët marrin kartën jeshile në SHBA.
Aktualisht janë më pak se 200 emigrantë çeçenë që jetojnë në SHBA, kryesisht në Boston.
70 përqind e tyre janë gra, pasi meshkujt nuk marrin nënshtetësi për shkak të frikës së terrorizmit.
Çeçenia është përfshirë në një betejë të ashpër me Rusinë dhe dhjetëra atentate terroriste në tokën ruse mbajnë firmën e çeçenëve.
Të dy vëllezërit deklaronin se ishin krenarë që ishin nga Çeçenia.
“Më mungon atdheu,” shkruante në Twitter vëllai i vogël.
Vëllai më i madh, Tamerlan, që ishte boksier, kishte thënë se nuk mund të përfaqësonte Çeçeninë në Lojërat Olimpike. Por ai kishte thënë se më mirë përfaqësonte Amerikën se Rusinë.
Lideri çeçen, Ramzan Kadyrov ka deklaruar se nuk duhen bërë paralele mes çështjes çeçene dhe këtij akti terrorist.
“Rrënjët e së keqes janë në SHBA. Ata janë rritur aty dhe aty janë formuar bindjet e tyre,” tha Kadyrov

shum misterioze edhe e nderlikume ne tnjejten koh me duket kjo