Sateliti jofunksional gjerman ROSAT, i rëndë 2.7 tonë, ka rënë mbrëmë në Tokë, por zyrtarët ende nuk dinë se ku kanë rënë copët e tij. Sateliti gjerman, i vjetër 21 vjet, ka hyrë në atmosferën e Tokës ndërmjet orës 2 e 45 dhe 3 e 15 minuta të mëngjesit të sotëm sipas kohës sonë.

“Momentalisht nuk kemi informata që pjesët e satelitit kanë rënë në sipërfaqe tokësre”, thuhet në njoftimin e Qendrës gjermane të aviacionit.

Disa orë para rënies së këtij sateliti, nga qendra gjermane kanë njoftuar se pjesët e satelitit nuk do të godasin Evropën, Afrikën dhe Australinë. Shkencëtarët kanë vlerësuar se mund të bie në dy qytete milionëshe kineze Çongkving dhe Çengdu, mirëpo nga atje nuk ka pasur kurrfarë raportimesh për copa të rëna të satelitit. Vlerësohet se copët kanë rënë diku ndërmjet Oqeanit Indian dhe Mjanmarit.