Tiranë, 12 dhjetor 2013, NOA.al-Prefekti i Vlorës, Besnik Dervishi sapo ka dalë nga Prokuroria e Krimeve të rënda, ku është marrë në pyetje për rreth 3 orë nga grupi hetimor. burimet bëjnë të ditur se prefekti ka thënë se kishte një takim pranë kryeministrisë dhe nuk ka gjetur parking. Ai ka kërkuar ndihmën e gardistëve, për të parkuar makinën dhe nuk e dinte se poshtë saj ishte fshehur eksploziv. Dervishi kishte ardhur nga Vlora me makinë këtë mëngjes dhe nuk bëhet e ditur se ku mund ta kishte parkuar makinën gjatë natës. Ai ka shprehur habi të madhe kur ka mësuar se poshtë mjetit të tij, tip Peugeot 407, u gjet 200 gramë tritol C4. Ndërkaq, burime zyrtare nga Ministria e Brendshme bënë të ditur se Dervishi kishte tentuar në hynte në Kryeministri rreth orës 09:15 dhe makina e tij i është nënshtruar një kontrolli nga gardistët. Ata kanë pikasur eksplozivin dhe kanë ndaluar mjetin të hyjë në oborr. Mbeten të paqarta rrethanat e vendosjes së lëndës shpërthyese në makinë si dhe faktit nëse sulmi synonte prefektin e Vlorës apo Kryeministrinë. Burime zyrtare nga Ministria e Brendshme bëjnë të ditur se në makinën e dyshimtë gjendeshin 200 gramë eksploziv C4. Forcat xheniere kanë kryer shpërthimin e eksplozivit në afërsi të Kryeministrisë, duke i dhënë fund alarmit 1-orësh që mbërtheu kryeqytetin. Policia po verifikon rrethanat e parkimit të makinës në afërsi të kryeministrisë. Forcat xheniere kontrolluan automjetin, pasi një nga oficerët e Gardës konstatoi një sasi të vogël eksplozivi tek makina e dyshimtë, e parkuar pranë godinës së Kryeministrisë. Eksplozivi ishte vendosur tek një automjet tip Peugeot, 407, TR 5066 H, ngjyrë gri, që ishte parkuar në anën e majtë të Kryeministrisë. Ndërkaq është identifikuar pronari i saj. Është Besnik Rrapo Dervishi, prefekt i Vlorës. Nuk dihen rrethanat në të cilat prefekti i Vlorës e ka lënë makinën në oborrin e Kryeministrisë. Janë shoqëruar disa nga punonjësit e Gardës, për t’u marrë në pyetje lidhur me parkimin e makinës së Dervishit. Po verifikohen tashmë të gjithë kamerat e sigurisë për të zbardhur ngjarjen e plotë mbi eksplozivin. Në automjetin e prefektit, polici tashmë ka nisur të marrë gjurmët e mundshme, që mund të çojnë në zbulimin e autorit, shenjat e gishtërinjve, qimet e flokut dhe gjithçka që mund të shërbejë si mjet identifikimi, janë në fokusin e grupit hetimor. /f.b/noa/