Kryetari i Lëvizjes Socialiste për Integrim, Ilir Meta gjatë një takimi me të rinjtë e LRI-së në Kamëz është shprehur se qytetarët shqiptarë paragjykohen për shkak të politikës. Meta e argumentojë këtë me respektimin e rregullave pas liberalizimit të vizave, ku Shqipëria ishte më korrektja nga vendet e Ballkanit.

“Është kënaqësi që të shohim një vit pasi hoqëm vizat për të gjithë qytetarët e Shqipërisë që qytetarët shqiptarë i respektuan detyrimet e Bashkimit Europian më mirë se qytetarët e tjerë të vendeve të tjera të Ballkanit dhe të rajonit tonë. Kjo tregon qartë që vendi është në një stad të ri, që qytetarët shqiptarë janë në një nivel shumë më të lartë se sa paragjykohen padrejtësisht nga politika”, tha Meta.

Kreu i LSI-së tha se tani është kohë që të punohet për marrjen e statusit të vendit kandidat “që Shqipëria ta fitojë pikërisht në këtë vit të rëndësishëm që është viti i 100-vjetorit të Pavarësisë dhe të formimit të shtetit shqiptar”. /F.S/