Në tryezën e radhës të Programit për një Rilindje Shqiptare, që kishte në fokus energjinë, kryetari i Partisë Socialiste tha se sektori energjetik po shkon drejt rrënimit për shkak të atyre qe Rama i quajti, politika të mbrapshta të qeverisë dhe privatizimeve korruptive

"Qeveria i ka shtrirë monopolet në shfrytëzimin e pasurive natyrore të vendit, duke vënë një të mirë të madhe publike në shërbim të një pakice sipërmarrësish klientë të qeverisë ngushtësisht të lidhur përmes interesash politike dhe financiare me grupin që një qeveri kontrollon gjithë këtë fushë", tha Rama.

Kreu i socialistëve thotë se kostot e korrupsionit dhe modelit të dështuar energjetik kanë rënë mbi qytetarët.

"Sot energjia elektrike është 65 përqind më e shtrenjtë se në vitin 2005, nafta është 3 herë më e shtrenjtë se në vitin 2005, qindra miliona euro i mungojnë ekonomisë kombëtare sepse kontrata e privatizimeve, në funksion të investimeve nuk është respektuar, pra kompanitë fitojnë, Shqipëria humbet, kompanitë shumëfishojnë fitimet, shqiptarët humbasin", tha Rama.

Socialistët parashikojne ne programin e tyre të ndërtojnë një politikë të re energjetike, e cila sipas opozitës, së pari do të nxjerrë sektorin nga korrupsioni për zhbllokuar pasuritë natyrore.

"Për t'i shfrytëzuar të gjitha lejet koncensionare për vepra energjitike që nuk i kanë respektuar afatet ligjore dhe për të krijuar mundësi për përfshirje përmes konkurrencës dhe transparencës të investitorit serioz, vendas apo të huaj", tha Rama.

Ndërsa shtylla e dytë e politikës energjetike të socialistëve do të jetë ajo e përpunimit të pasurive natyrore në vend për të shtuar vlerën e tyre.

"Mendoj se është i papranueshëm raporti i sotëm, midis nxjerrjes jashtë të lëndëve të para bruto dhe importimit të lëndëve të gatshme nga jashtë. Eshtë i papranueshem, dhe prespektiva e këtij raporti është e qartë, shkatërrim ekonomik", tha Rama.

Në fund lideri socialist përcolli edhe një mesazh në lidhje me debatin mbi taksën progresive, që sipas tij dikush po tenton ta keqorientojë.

"Problemi nuk janë të pasurit, problemi është varfëria dhe varfëria si problem mund të trajtohet dhe mund të zgjidhet në aleancë me të pasurit, por aleanca nënkupton që secili në vendin e vet, secili në rolin e vet dhe secili detyrimet e veta, në funksion të qellimit të përbashkët, që pasuria të shtohet, por jo të shtohet mbi një humnerë ekonomike, ku një grusht njerëzish në fund fare të këtij procesi të ndihen të kërcënuar nga një popull i tërë i rritur dhe i tmerruar për shkak të pamundësisë për të përballuar kushtet e jetës", tha Rama.

tch