Ekspertët e Bankës Botërore kanë mbërritur sërish në Tiranë për të negociuar me qeverinë paketën shtesë të kredisë për mbështetje buxhetore.

Top Channel ka mësuar se palët po zhvillojnë bisedime intensive dhe se deri tani nuk ka ende një përfundim konkret. Megjithatë mësohet se bisedimet mund të zgjasin deri nga java tjetër, ku me gjasa do të merret dhe vendimi final nëse qeveria do e pranojë apo jo kredinë me kushtet që vendos banka për reforma të caktuara dhe kufizim të shpenzimeve buxhetore.

Ndërkaq vetë Ministria e Financave në programin ekonomik dhe fiskal nuk e fsheh se kredia e bankës do të lehtësonte buxhetin dhe kërkesën për borxh në tregun e brendshëm, duke ulur kështu rreziqet për financimin e defiçitit. Në dy muajt e parë të vitit, qeverisë i është dashur të përballet me rritjen e normave të interesit, sa herë që ka dalë në treg për të marrë borxh. Në ankandin e fundit të bonove njëvjecar interesat arritën në 7.32 për qind nga 6.73 që ishin në dhjetor.

Deficiti buxhetor, qeveria pranon vështirësitë për të marrë borxh

Gjendja e vështirë në tregun financiar dhe zhvillimet që priten gjatë këtij vitit kanë vënë nën alarm ministrinë e financave për financimin e deficitit buxhetor.

Në kuadrin e ri fiskal të hartuar muajin e kaluar ministria vëren se rreziqet për huamarrjen e qeverisë janë rritur për shkak të krizës.

Në dokumentin zyrtar thuhet se “parashikimi për financimin e deficitit në vitin 2012 bazohet në skenarin se kriza e borxheve në vendet fqinje do të vazhdojë edhe gjatë këtij viti duke ndikuar ndjeshëm strategjitë e bankave private në Shqipëri”.

Këta faktorë vërejnë ekspertët e Ministrisë do të ndikojnë në mënyrë të ndjeshme financimin e deficitit për vitin 2012 dhe progresin e emetimeve të letrave me vlerë". Në buxhetin e këtij vitit huamarrja e qeverisë në tregun e brendshëm parashikohet 18.8 miliardë lekë ose mbi 7 miliardë lekë më pak se vitit i kaluar.

Por edhe me këtë ulje, Ministria e Financave sërish thekson se tregu është shumë skeptik çka kërkon monitorimin e vazhdueshëm të tij, me qëllim që të shmangen problemet në financimin e defiçitit buxhetor dhe të garantohet likuiditeti i nevojshëm për thesarin.

Në total qeverisë i duhet të sigurojë 41 miliardë lekë borxh për të financuar buxhetin e këtij viti, prej të cilave 22.3 miliardë ka parashikuar t'i marrë në tregun e jashtëm, kryesisht përmes projekteve të donatorëve.
Por për shkak të procedurave burokratike financimet e huaja nga donatorët shpesh kanë vonesa në kohë dhe nuk garantohen në masën 100 për qind brenda vitit buxhetor, çka mund ta detyrojë qeverinë të rrisë huamarrjen e brendshme. “Ne mendojmë se në një skenar të financimit të deficitit vetëm përmes huamarrjes së brendshme, njëlloj si ai i vitit të kaluar, sfidat për menaxhimin e borxhit do të jenë të mëdha vërejnë ekspertët e Ministrisë.”
TCH