Ambasadori i OSBE-së në Tiranë Eugen Wollfarth deklaroi se klasa politike shqiptare duhet të bashkëpunojë në përmbushjen e reformave të integrimit, duke e kthyer procesin në axhendë kombëtare.

Nga Fieri, ku u takua me kreun e bashkisë së këtij qyteti Baftjar Zeqo, ambasadori theksoi se përmbushja e reformave bën të mundur integrimin e vendit.

Wollfarth vuri në dukje se nëse nuk bëhet përpara me reformat për të cilat ka nevojë vendi, atëherë përgjegjësia bie mbi klasën politike.

Një ditë më parë komisioneri Stefan Fule tha: “Një dialog konstruktiv politik do të garantojë që Shqipëria po jep rezultate konkrete në zbatimin e marrëveshje
politike të nëntorit të kaluar, veçanërisht në lidhje me reformën zgjedhore dhe reformën për regulloren e paralamentit. Shqipëria duhet të vijojë progresin në përmbushjen e 12 kritereve, me theks të veçantë në krijimin e provave të besueshme në fushat e shtetit të së drejtës dhe luftën kundër korrupsionit”, nënvizon Komisioneri në një komunikatë për shtyp.

Pasi përsëriti se vendi gëzon angazhimin dhe mbështetjen e plotë të Komisionit, Fule fton Shqipërinë të përqëndrohet tek reformat gjithëpërfshirëse, të nevojshme për integrimin.

“Dua ta theksoj sërish, se që vendi të shënojë sukses në axhendën europiane, është e rëndësishme që kjo të kthehet në një axhendë kombëtare, për qeverinë, për opozitën dhe për shoqërinë civile. Një process me të vërtetë gjithpërfshirës është kyç për suksesin e Shqipërisë në përpjekjet e saj për reforma”, përfundon Komisioneri.