Dje ambasadori amerikan në Tiranë, pas një takimi me Edi Ramën në selinë e PS-së, deklaroi në mënyrë të drejtëpërdrejtë se SHBA-të duan të shohin një konsultim të palëve për zgjedhjen e Presidentit të Republikës. Ai iu shmang termit “president konsensual”, por la të kuptohej qartë se SHBA-të nuk do të donin një president të zgjedhur në mënyrë të njëanshme nga PD-ja. Ndërkohë, ambasadori deklaroi se kishte diskutuar me Ramën në parim për një vizitë zyrtare të këtij të fundit në Uashington.

Dy ditë më parë, ambasadori amerikan ishte takuar publikisht në një lokal te “blloku” me “yllin në ngjitje” Basha, pas vizitës së këtij të fundit në Uashington. Ky takim vinte edhe pas deklaratës së fortë të amabasadorit në ABC News, se politikanët në moshën mbi 60-vjeç bëjnë mirë t’u hapin rrugën politikanëve të rinj.

Ndërmjet këtyre dy takimeve publike, ka ndodhur edhe një takim që nuk është përmendur në media. Në të njëjtin lokal ku u takua me Bashën, ambasadori amerikan, i shoqëruar me disa punonjës të tjerë të ambasadës, u takua një ditë më parë edhe me udhëheqësin de facto të Aleancës Kuqezi, Kreshnik Spahiun. Takimi u krye në një orë të ditës kur lokali ishte i mbushur plot me të rinj, grupmosha që duket se e përkrah më shumë këtë aleancë. Nuk kemi informacion se çfarë është biseduar gjatë takimit të gjatë mes diplomatëve amerikanë dhe Spahiut, por dihet se ambasadori amerikan, në intrevistat e tij në Top Channel dhe ABC News, ka dhënë konsiderata pozitive për lëvizjet patriotike (jo nacionaliste). Nuk është çudi që, pas vizitës së Bashës në Uashington dhe asaj të pritshme të Ramës atje, të dëgjojmë edhe për një vizitë të Kreshnik Spahiut.

Duket se Berisha nuk ka fituar pikë në Uashington me sulmin që u bëri “faqezinjve” të Aleancës Kuqezi…