Nënkryetari i Këshillit të Lartë të Drejtësisë, Kreshnik Spahiu, lajmëroi për dorëheqjen e tij të parevokueshme nga detyra që mban, në një konferencë për shtyp mëngjesin e së premtes.

Spahiu argumentoi vendimin e tij me pamundësinë e një gjykimi të paanshëm nga Gjykata Kushtetuese për padinë që ai ka ngritur kundër mazhorancës, në lidhje me procedurën e nisur prej tyre për shkarkimin e tij nga detyra për shkelje të supozuara të mandatit të marrë në 2008-n.

Procedura është konsideruar që në fillim si e paligjshme nga ana e Spahiut dhe si një shkelje e qartë e pavarësisë së Këshillit të Lartë të Drejtësisë, parashikuar

Kam vendosur të largohem nga detyra e nënkryetarit të Këshillit të Lartë të Drejtësisë, për të lënë Gjykatën Kushtetuese që të vendosë në lidhje me akuzat që kërkojnë të njollosin emrin tim

Kreshnik Spahiu
në Kushtetutën e Shqipërisë.

“Kam vendosur të largohem nga detyra e nënkryetarit të Këshillit të Lartë të Drejtësisë, për të lënë Gjykatën Kushtetuese që të vendosë në lidhje me akuzat që kërkojnë të njollosin emrin tim. Megjithatë, dua të bëj të qartë që nuk do të rikthehem në këtë rol edhe në rast Gjykata do të vendosë në favorin tim”, u shpreh Spahiu.

Në fjalën e tij të shkurtër, Spahiu evidentoi një “betejë të vazhdueshme”, e nisur tre vjet e gjysmë më parë, e institucionit të KLD-së për ruajtjen e pavarësisë dhe rolit të arbitrit, përballë presioneve të vazhdueshme të politikës dhe Parlamentit.

”Pavarësia e drejtësisë, si një çështje thelbësore për të ardhmen e vendit, është shndërruar në luftën time personale dhe do të vazhdoj të luftoj për të edhe larg detyrës si nënkryetar i KLD-së”, theksoi Spahiu.

Në fund të fjalës së tij, gjithashtu lideri i Aleancës Kuqezi, falenderoi të gjithë bashkëpunëtorët për ndihmën e dhënë në “këtë rrugë të gjatë dhe të vështirë”, në krye të KLD-së.

Alibeaj: Komisioni hetimor vijon punën

Kryetari i Komisionit për shkarkimin e nënkryetarit të Këshillit të Lartë të Drejtësisë, Enkelejd Alibeaj deklaroi në mbledhjen e së premtes, se dorëheqja e numrit dy të KLD-së bëhet zyrtare kur të mbërrijë në kuvend shkresa.

"Deri në mbërritjen e shkresës për Spahiun, komisioni hetimor do të vijojë punën e tij", tha Alibeaj. Sipas tij, Komisioni do të përgatisë kallëzim penal për refuzim të kërkesës për informacion.

KLD, Topi: Së shpejti nënkryetari i ri

Presidenti i Republikës, Bamir Topi ka refuzuar ta komentojë dorëheqjen e nënkryetarit të Këshillit të Lartë të Drejtësisë, Kreshnik Spahiu.

Megjithatë, kreu i shtetit dhe njëkohësisht numri një i KLD-së ka bërë të ditur se së shpejti do të publikojë emërimin e ri për zëvendësimin e kryetarit të Aleancës Kuqezi.

“Në mbledhjen më të afërt të KLD-së do propozoj emrin e nënkryetarit të ri. Institucionet nuk mund të mbeten vakante, prandaj emërimi do të bëhet sa më shpejt”, ka deklaruar Topi.