Zëvëndëskryeministri dhe ministri i Jashtëm, Edmond Haxhinasto, i thirrur në një seancë dëgjimore në Komisionin Parlamentar të Integrimit, i ka bërë një ekspoze rolit të kësaj Ministrie në lobimin për çuarjen përpara të proceseve integruese.

Haxhinasto theksoi se janë zhvilluar 16 takime me homologët europianë për këtë çështje. Më pas ministri i Jashtëm është ndeshur me një sërë akuzash të anëtarëve të opozitës në këtë Komision për emërimet nepotike në diplomaci, për të cilat deputeti Marko Bello tha se roli kësaj Ministrie është zbehur duke e kthyer në një OJF dhe si pasojë ka pësuar dështime.

Ndërsa kryetari i Komisionit, Ditmir Bushati tha se "çdo njeri që është paguar në shërbimin diplomatik, jashtë kuadrit ligjor në fuqi do të duhet bashkë me persona të tjerë që kanë bërë pagesat, do të duhet t'ia kthejnë djersën qytetarëve shqiptarë në buxhetin e shtetit, aq më tepër në këto kohë krizë që jetojmë, një më një".

Deputeti Taulant Balla tha se deri në fund të marsit opozita do të votojë të gjitha ligjet me tre të pestat dhe theksoi se Ligji i ri për Shërbimin Diplomatik nuk do të mund të miratohet në parlament.

"Unë kam këtu dhe të gjitha lidhjet nepotike në Ministrinë e Jashtme. Thatë se do të legalizoni ndërtimet pa leje në diplomaci, me një ligj. Ai ligj nuk mund të kalojë në kuvend, sepse 17 deputetë kanë konflikt interesi. Tregoni zoti Ministër kriteret mbi të cilat është pranuar në shërbimin diplomatik dhëndri i Jozefina Topallit dhe unë te pranoj që të votoj për projektligjin që ti mund të sjellësh për të legalizuar këto ndërtime pa leje në diplomaci. Neni i parë i këtij ligji të jetë asnjë deputet, asnjë ministër, asnjë kryetar parlamenti, asnjë kryeministër mos të ketë familjarët e vet në shërbimin diplomatik", tha Balla.

Deputetja demokrate Rajmonda Bulku ka mbrojtur punën e deritanishme të ministrit Haxhinasto dhe emërimet për të cilat e akuzon opozita.

Shqetësimet e anëtarëve të opozitës në këtë parlament kanë marrë përgjigje nga ministri Haxhinasto, i cili i quajti diskutimet e deputetëve socialistë, si të dala jashtë mode dhe jokoherente.

"Koncepti juaj për reformën mbetet te disa emra të përvecëm, me lidhje ose pa lidhje me përfaqësues të caktuar. Ata kanë të gjithë të drejtën, për shkollën që kanë, për integritetin e tyre, të kenë të drejtë të punojnë edhe në shërbimin e jashtëm. Nuk është e vërtetë se përfaqësuesi danez ka thënë se: 'Eshtë shokuar Brukseli'. Lexojeni deklaratën mire. Ai është përfaqësues i presidencës daneze, do të flasë për të dhe nuk mund të komentojë për vendimet e institucioneve të pavarura shqiptare", tha Haxhinasto.

E ndërsa kjo seancë dëgjimore u përqendrua tek emërimet zoti Haxhinasto foli për axhenden e integrimit pavaresisht problematikes me te cilen perballet BE.