Vendime të rëndësishme janë marrë gjatë mbledhjes së fundit të Bordit të Drejtuesve të CEZ Shpërndarjes. Mësohet së çështja kryesore e diskutuar ka qenë shkarkimi nga detyra e drejtorit të Bordit, Jozef Hejsek, i cili ka drejtuar deri më tani kompaninë që prej privatizimit të Operatorit të Sistemit të Shpërndarjes (OSSH). Kompania nuk ka dalë ende më një qëndrim për të shpjeguar arsyet e një vendimi të tillë. Megjithatë, pritet që sot të zhvillohet një konferencë për shtyp e CEZ Shpërndarjes, në të cilën do të jepen më shumë detaje mbi veprimin në fjalë. Në vend të Hejsek është emëruar një ndër pjesëtarët e stafit të tij të ngushtë.

CEZ Shpërndarja ka pasur një marrëdhënie të tensionuar gjatë muajve të fundit me organet shtetërore si edhe Entin Rregullator të Energjisë pas vendimit të këtij të fundit për mosrritjen e çmimit për këtë të fundit sipas kërkesës së bërë, ç’ka duket të kenë kontribuuar në shkarkimin e Hejsek. ERE gjithashtu vendosi të rrisë çmimin që KESH ia shet energjinë kësaj kompanie duke i ulur të ardhurat e parashikuara me mbi 150 milionë dollarë. Çmimi që KESH i shet energjinë CEZ-it u rrit nga 1.48 lekë për kilovat në 2.83 lekë, ndërsa tarifa për transmetimin e energjisë nga OST, u rrit nga 0.6 në 0.65 lekë.

Menjëherë pas këtij vendimi, CEZ Shpërndarja deklaroi se për shkak të mungesës së të ardhurave do të detyrohej që të shkurtonte investimet si edhe pagat dhe stafin. “Në bazë të vendimit të Entit Rregullator të Energjisë për tarifa të reja të energjisë elektrike për vitet 2012-2014, CEZ Shpërndarje ka pësuar ulje prej 19 përqindësh të tarifës së shpërndarjes dhe shitjes së energjisë elektrike”, – deklaroi menjëherë pas vendimit të ERE-s kompania. Por CEZ Shpërndarja nuk u mjaftua me kaq, kompani iu drejtua ERE me një ankesë, e cila përsëri iu kthye mbrapsht.

Një ndër arsyet kryesore të vendimit të ERE-s për mos rritjen e çmimit të kërkuara nga CEZ Shpërndarja në masën 4.5 për qind për tre vitet e ardhshme ka qenë plani i investimeve të panevojshme të parashikuara nga kompania. Sipas ekspertëve të ERE-s, kompania çeke kishte parashikuar investime, rrjedhimisht edhe shpenzime, të cilat ishin të panevojshme për sistemin.