Një avion rus i tipit ”Superxhet 100” me 46 persona në bord është zhdukur në Indonezi gjatë një fluturimi demonstrues, pasi ishte ngritur nga Xhakarta. Sipas disa dëshmitarëve okular raportohet se avioni ka fluturuar në nivele të ulta drejt një mali, por ata nuk kishin dëgjuar ndonjë shpërthim.
Gagah Prakoso, zëdhënësi i Agjencisë Kombëtare të Kërkim Shpëtimit ka deklaruar se : “Avioni u zhduk nga radarët ndërkohë që fluturonte në rajonin Bogor, në jug të Xhakartës. Po vazhdojmë kërkimet, por nuk jemi ende në dijeni nëse është rrëzuar apo jo”.
Avioni ishte nisur nga Xhakarta rreth orës 9 e 20 me orën lokale. Sipas parashikimeve, avioni duhej të ulej në aeroportin Halim Perdanakusuma pas një ore nga nisja e fluturimeve, por shumë shpejt piloti kërkoi leje për tu ulur nga 3.000 në 1.800 metra dhe që prej këtij momenti humbi kontaktet me kontrollorët e fluturimeve. Malet Salak dhe Halimum, zona ku është zhdukur avioni me 46 paragjerë në bord, janë të larta pak a shumë 2 000 metra.