Babai i vogëlushes: “Do e vras vetë pedofilin, gjykata e dënoi sikur vodhi pula”

“Drejtësia në Shqipëri është e kalbur. Është turp që kemi një shtet të tillë. Kjo drejtësi e dënoi pedofilin që tentoi të abuzonte me vajzën time sikur ai të kishte vjedhur një pulë. Jam skandalizuar nga vendimi u gjykatës, ndaj jam i detyruar të bëj vetëgjyqësi. Vladimir Xhelollarin nuk e lë të gjallë. Do ta vras sa të dalë nga burgu, pasi nderin e kam të shenjtë”.

Kështu ka deklaruar Artan Manxhari, babai i 12- vjeçares nga fshati Leminot i Korçës pasi Gjykata e Shkallës së Parë e Korçës ka dënuar me 2.8 vjet burg për “kanosje” dhe “kryerje të veprave të turpshme” 52-vjeçarin Xhelollari.

“Unë nderin e kam të shenjtë. Do e vras vetë, se nuk mund të duroj një turp të tillë. Dhe për më tepër, nuk e duroj dot vajzën time në këtë gjendje të rënduar psikologjike ku është sot për shkak të traumës që pësoi nga tentativa abuzuese e pedofilit. Ju e dini që ajo bëri dy tentative vetëvrasje. E përsëris, do e vras vetë kur ai të lirohet. Nuk mund të lejoj që ai të më kalojë para dyqanit sikur nuk ndodhi asgjë, ndërkohë që vajza ime vuan ende pasojat e këtij pedofili. Më ka shkelur në kallo dhe nuk e lë të gjallë. I kam marrë parasysh të gjitha pasojat”, shprehet për GSH-në Artan Manxhari.

Ai shton as që e do pajtimin me familjen e pedofilit dhe se shyqyr që është gjallë dhe do ta vendosë drejtësinë vetë.