Kreshnik Spahiu ka përuruar çeljen e zyrës së partisë së tij në qytetin e Elbasanit.

Sipas tij, kjo është një lëvizje popullore që shënon për herë të parë fundin e një kapitulli të dy “sulltanëve” të vjetër të politikës shqiptare, të Partisë Demokratike dhe Partisë Socialiste për të krijuar një epokë të re në politikën shqiptare.

Spahiu gjatë fjalës së tij u shpreh se në këtë lëvizje politike mbarëkombëtare përfaqësohen interesat e gjithë shqiptarëve që jetojnë në trevat e tyre etnike.

Daljen e tij të parë publike si një parti të re, Kreshnik Spahiu do të bëjë nga qyteti i Elbasanit me 24 mars nën moton “ Shqipëria Bëhet”, duke ftuar të gjithë qytetarët që të bëhen pjesë e kësaj lëvizje.

“Ka ardhur fundi i kapitullit për dy dinosaurët e politikës shqiptare, që do të rinovohet nga një gjak i ri. Jemi këtu në Elbasan jo vetëm për të inaguruar zyrën e re, por edhe për të lëshuar një ortek kuqezi që nga Elbasani, qyteti që simbolizon pikën e bashkimit të të gjithë shqiptareve mes jugut dhe veriut. Orteku ynë do të përshkrojë të gjithë Shqipërinë dhe vendet ku jetojnë shqiptarët”, deklaroi Spahiu.
TCH