Çështja e sigurisë ishte tema kryesore e një tryeze të grupit të punës për programin e PS-së “Për një rilindje shqiptare”. Në nisje të saj, kryesocialisti Rama i cilësoi alarmante shifrat që pasqyrojnë situatën e krimit në vend, duke theksuar se shteti e ka humbur betejën këtë fenomen që është kthyer në makth të shqiptarëve.

Sipas Ramës, gjendja e vështirë ekonomike është një ndër shkaqet kryesore të rritjes së kriminalitetit në vend.

“Çdo i ri i tërhequr prej krimit e ka një shtysë më shumë, çdo kriminel dhe bandë kriminale nuk ka frikë nga ndëshkimi, çdo polic i thjeshtë e ka një justifikim për t’u tërhequr e futur në strofkë, por edhe për të zgjetur dorën për bakshishet”, tha ai.

Rama u shpreh se socialistët kanë ngritur një grup pune që duhet të dëgjojë sa më shumë ekspertë dhe njerëz në të gjithë Shqipërinë në lidhje me çështjet e sigurisë, një punë që do të reflektohet në programin e socialistëve .

“Do të sillemi ndryshe me ligjin e drejtësinë, do të sillemi ndryshe me krimin e shkaqet e tij. Luftën sot po e fiton krimi, nesër do ta fitojë shteti”, tha Rama.