Një këmbë e një statuje është gjetur në rrënojat arkeologjike të Apolonisë.
Një ekspeditë shqiptaro-franceze pas zbulimit të një busti të ruajtur në gjendje shumë të mirë, brenda pak ditësh ka bërë zbulimin e dytë të rëndësishëm.

Këmba është gjetur në një nga kanalet anësore të vilave romake në bllokun e vilave në pjesën perëndimore të qytetit antik të Apollonisë.

Kjo këmbë tërësisht me material bronzi, e zbukuruar me punime në pjesën e prapme të saj, sipas specialistëve, daton në shekullin e dytë ose të tretë të erës sonë, e njohur ndryshe dhe si periudha romake në këtë qytet të lashtë.

Sipas njerit prej bashkëdrejtuesve të ekspeditës, profesor Zhan Lyk, gjetja e rrallë arkeologjike, sjell një zbulim po të rrallë, me anë të të cilit vërtetohet se në qytetin antik të Apolonisë ka ekzistuar një shkollë për skulpturat e llojit të tillë.

Kjo këmbë, tha ai, i përket një statuje që kap një gjatësi rreth dy metra.

Ajo u gjet në kanalin ujëmbledhës të bllokut të vilave romake, është lënë atje gjatë braktisjes që i bënë qytetarët pronarë të këtyre vilave, qytetit antik, në periudhën romake.

Pas zbulimit pjesa e këmbës prej bronzi, i është nënshtruar restaurimit paraprak, pasi u pastrua prej dherave dhe mbetjeve të tjera, kjo pjesë statuje këmbe, tregon qartë se është e llojit të vetëm të gjetur në vendin tonë.

Në këtë këmbën prej bronzi ruhen mirë gdhendjet zbukuruese prej skulptorit.

Me këtë gjetje të re Apolonia po futet në rrjedhen e qyteteve që ka se çfarë të ofrojë për turistët vendas dhe të huaj.