Një grup kërkuesish i General Hospital of Salzburg, të drejtuar nga Franz Wendtner, bënë të ditur rezultatet e një studimi, sipas të cilit personat që vuajnë nga dhimbjet e kurrizit nuk kanë pasur më dhimbje mbasi dëgjonin muzikë. Kërkuesit u ndihmuan dhe nga bashkëpunimi me 65 pacientë, të cilët vuanin nga dhimbje kronike të kurrizit, që kishin ardhur si pasojë e operacionit në hernien e diskut (unazat e shtyllës kurrizore). Pacientët u ndanë në dy grupe të ndryshme. Grupi i parë u kurua sipas terapisë mjekësore tradicionale, ndërsa grupi tjetër duhet të dëgjonte muzikë të paktën 25 minuta në ditë me anë të kufjeve. Mbas tre javësh kërkuesit vunë re përmirësime të dukshme në grupin që dëgjonte muzikë. Dhimbjet e tyre, në krahasim me grupin që u kurua me terapi mjekësore, rezultuan të papërfillshme. Sipas Franz Wendtner, shpjegimi është i thjeshtë: “Melodia muzikore, e shoqëruar nga pamje sugjestive dhe relaksuese, ndikon pozitivisht në sistemin nervor. Në këtë gjendje qetësie tensionet psikike dhe muskulore ulen duke çliruar një ndjenjë pozitive”. Për të pasur efekte terapeutike, thotë Franz Wendtner, muzika e këshilluar është ajo klasike.